2008an onartu zuten Anoetan Lasarbe eremuarentzat Hirigintza Plana. Pixkana, urteen poderioz, Hirigintza Plan hori gauzatzen joan da eta gaur egun Lasarbe 3 eta 4 eraikinak egiten ari dira. Plan horretan, Leku Eder eraikina eta Txulo baserria lotuko lituzkeen bide bat eraikitzea zegoen aurreikusia, baina udalak asmo hori ez gauzatzea erabaki zuen eta bere ordez, aisialdi gune bat eraikitzea. Orain hasi dira Lasarbe eremua urbanizatzen.
Aurreko urte amaieran sinatu zuen Anoetako Udalak Aburuza eraikuntza enpresarekin hitzarmena, eremu horretan aisialdi gune bat egingo zela zehaztuz. Orain hasi dituzten urbanizatze lanak ekidin ezinezkoa lanak direla aipatu du udalak, egin beharrekoak, eta jakinarazi du, gehienez, bost hilabetez luzatuko direla.
Hirigintza Plan horretan Lasarbe eremuan urbanizatze eta etxebizitza gehiago egitea aurreikusten da. Udalak aipatu duenez, ordea, momentu honetan etxebizitzak ez dira lehentasunezkoak: "Gaur gaurkoz ez dugu aurreikusten epe motzean horiek eraikitzerik. Eraikin horiekin hasi aurretik azterketa sakon bat egin behar da Anoetan etxebizitzekin dagoen egoeraren inguruan, eta horri lotuta, erabaki ahalko da zer nolako etxebizitza eta zenbat eraiki behar diren".