Emakume bat hilda aurkitu zuten pasa den ostiralean, Donibane Lohizuneko (Lapurdi) hotel batean, eta erailketa matxista salatzeko hainbat elkarretaratze egin dituzte eskualdean, mugimendu feministak deituta. Hain justu, Tolosan (argazkian), Aiztondon –Villabona eta Zizurkil arteko oinezkoen zubian– eta Anoetan egin dituzte elkarretaratzeak.
Lehen zantzuek erakusten dutenez, ostiralean hilda aurkitu zuten 33 urteko emakumearen hilketa «krimen bortitza» izan zen. Hala adierazi du Jerome Bourrier Baionako prokuradoreak. Gertatutakoa argitzeko ikerketa zabalik dago oraindik ere; «feminizidioa» aipatu du prokuradoreak, hilketa matxistaren hipotesiari indar emanez, eta aurrez prestatutako hilketa bat izan daitekeelakoan dago. Delitu hori biziarteko kartzela zigorrarekin zigortzen du Frantziako legediak. Hortaz gain, Bourrierrek iragarri du hildakoaren bikotekidea, ustezko hiltzailea, atxilotuta izango dutela epaiketa egin arte. Gorpua aurkitu bezain pronto atxiki zuten 37 urteko gizona, galdekatzeko; jakinarazi dute oraingoz ez dutela aske utziko.
Mugimendu feministak irmoki gaitzetsi du azken erailketa matxista. «Indarkeria matxistak hamaika aurpegi ditu eta emakumeok bizitzako alor guztietan jasaten dugu indarkeria hori». Hala, lehen mailako gai politikotzat hartzea eta «benetako neurriak» behingoz hartzea exijitu dute. «Saretze feministak egingo gaitu libre», esan dute.
Tolosako Udalak ere bat egin du elkarretaratzearekin eta emakumearen familiarekiko eta gertukoekiko elkartasuna adierazi du. «Herriko mugimendu feministarekin eta eragile sozialekin elkarlanean, indarkeria matxista desagerrarazteko borrokan jarraitzeko konpromisoa berresten dugu, indarkeria matxistarik gabeko herri baterantz urratsak emanez», adierazi du udalak. Amasa-Villabonako Udalak ere bat egin du elkarretaratzearekin.